Kabaminang.com – Minangkabau. Kalau lah duduak di lapau, ado kopi di ateh meja, jan lupo pulo goreang pisang. Duo panganan ko lah lamo manjadi pasangan nan susah dipisahkan dalam keseharian urang awak.
Goreang pisang indaklah makanan nan barameh. Bahannyo sederhana bana, pisang nan lah masak dicelupkan ka adonan tepung, lalu digoreang dalam minyak angek sampai warnonyo kuniang ameh.
Bilo lah masak, harumnyo mulai mancucuik. Bagian lua agak garing, bagian dalamnyo lembuik jo manih. Dimakan hangek-hangek, apolai sambia manyeruput kopi angek, rasonyo lamak bana.
Di lapau-lapau kampuang, goreang pisang acok jadi kawan barundiang. Sambie mangopi, urang awak bisa bacarito macam-macam. Mulai dari kaba kampuang, musim di sawah, hasil dagang, sampai berita nan baru didanga di kabaminang.
Kadang, nan dibarundiangkan bukanlah perkara gadang. Tapi dari meja lapau nan sederhana itulah hubungan basamo tetap tarawat. Goreang pisang di ateh piriang, kopi di dalam cangkie, lalu carito barjalan panjang sampai indak teraso hari lah baranjak patang.
Bagi urang awak, lapau bukan hanya tampek maminum kopi. Lapau juo manjadi tampek basuo, batamu, dan basuo baliak jo kawan nan lah lamo indak basuo.
Goreang pisang punyo bagian tersendiri dalam suasana itu. Hargonyo barangkali indak sa,baraa, tapi kenangan nan lahir dari secangkie kopi jo sapiriang goreang pisang bisa dibao sampai lamo.
Goreang pisang jo kopi di lapau, sederhana hidangannyo, tapi rancak suasananyo. Itulah salah satu caronyo urang awak menikmati hari sambia manjago tali dunsanak jo kawan.
“Tungku Barapi”
